網頁

2018年4月16日 星期一

終於出世了 !

06.02.2018

永遠都會記住依一日 . 我用左 7.5 鐘將你帶到黎依個世界 . 當姑娘將你交到我手上時 , 無話好感動 , 只係覺得 ... 終於完結了 !

7.7 磅的你 , 對我依個細碼媽媽黎講 , 能夠靠自己生到你出黎 , 個個都話我好叻 .

小地勤 5 號就入返醫院 , 依個係醫生比我既期限 , 因為我有產前出血既情況 , 所以 BB 唔可以等到 40 周以後先出世 .

入院檢查 , 話有排都未生得 , 所以 6 號早上要落藥催生 . 我最怕係種豆 , 因為有一次見到對面床既媽媽種第一次唔成功 , 要再種 , 支針好粗好長 , 個媽媽種完之後 , 成床都係血 , 要換床單 , 兼且話好痛 , 所以好驚 .

6 號早上塞左藥 , 一直到 10 點醫生黎檢查 , 我都無咩感覺 , 但醫生就話我已經開左 1 度 , 要送去產房 . 產房好凍 , 終於要種豆 , 的確好痛 , 但我同自己講 , 我一定忍到既 . 好彩種一次就成功 , 不過 Keep 住隻手一郁就痛 , 反而肚痛就唔多覺 .

到中午 12 點 , 姑娘話我無咩反應 , 要再加藥 , 之後就開始好似有少少 M 痛 . 中午 2 點 , 姑娘話儀器 Check 唔到我有痛既反應 , 要再落重藥 ...

大約 3 點 , 我開始痛到出冷汗 , 頭髮都濕曬 , 我忍唔住細細聲 ee 呀呀左 , 姑娘就鬧我 , 叫我唔痛就唔好係到喊 , 我問有無止痛或笑氣 , 佢地好狠心話儀器顯示唔到我有好痛既情況 , 所以唔會比我住 ...

終於我痛到流眼淚 , 但就用手蓋住個口 , 唔敢喊出聲 , 怕被人再鬧 ... 4 點 , 姑娘見我 D 動作好似好痛 , 先黎再檢查 , 發現個儀器駁反左 ... 即刻駁返好 , 就叫醫生黎幫我打止痛針同比笑氣我 . 坦白講 , 我已經痛到聞笑氣都無反應 , 覺得笑氣好臭 , 所以都無聞了 . 止痛針打左 , 又好似唔覺有效咁 .

真係好痛好痛 , 仲好有想便便既感覺 , 原來係準備生得 . 醫生檢查完 , 就叫我試生 . 之後唔得 . 就話再等多陣 .

5 點左右 , 我真係忍唔到 , 姑娘再叫我試下 , 我用左 4 下力 , 無啦啦姑娘就話生左啦 . 其實我都真係 Feel 唔到自己生左 ... 我依個媽媽算好好彩 , 第一胎用左 7.5 鐘就生 , 算叫做快 .

生完就被人推返去大房休息 ... 但 Keep 住有姑娘叫你餵人奶 , 順產但傷口都會痛 , 係醫院既幾日 , 我經歷左好多唔開心既事 , 不過最近學湊 BB , 所以都無咩時間同大家分享 . 等我習慣當媽媽後 , 我就會再寫返日記架啦 !

2018年1月30日 星期二

2018 年入院記

31.01.2018

轉做文職後的小地勤 , 真係唔明點解比以前做前線時更忙 , 更多煩惱以及更唔開心 . 可能我對自己的確係有一定要求 , 每當我做好一件事 , 加給我的 , 不是讚賞 , 而係更多更多的額外工作 . 上頭對我太信任吧 ! 有時 , 我都會心裡不停反覆地問一句 " 公司仲有大把人 , 點解次次都係加比我做 ? 點解無人體諒下我個肚已經籮咁大 ? " 心理調節完後 , 都係繼續默默做 .

正當我為 2017 年年尾努力埋數同清數 , 又要為 2018 年既所有野去作準備 , 但又要應付一堆唔知係咩 , 本身唔係我負責既事既時候 , 我被同事既感冒菌傳染了 . 係 2017 年既最後一日開始作病 , 但因為太多野未清曬 , 而接手我工作既同事 , 每一個都係話要係我放產假前先放放左假 , 怕到時無假放 , 結果我都係病住咁返 2018 年既 1 月 1 號 . 返完個一日之後 ...

我半夜就入左醫院了 , 感冒 , 胃炎 , 子宮收縮同出血 ... 當時我未夠 35 周 , 係醫院 , 我食咩都嘔 , 最後嘔埋黃膽水 , 醫生轉左 3 隻止嘔藥比我都無效 . 嘔住咁去完成所有既檢查 , 胃痛到唔再覺得肚痛 .

終於當晚轉左另一特效藥 , 我先止到嘔 . 之後就係醫院住左 2 個幾星期 . 醫生本身想要我 37 周就催生 , 但後來見我休息左 2 星期 , 突然止左血 , 情況穩定返 , 就放返我返屋企休息 , 叫我等作動先再入院 .

坦白講 , 如果真係未夠 35 周就生 , 呀仔得個 4.4 磅 , 我會好怪責自己的 .

當我係醫院的時候 , 不停回覆同事既問題 , 話曬我的確未交低好所有野 , 當然 , 就算我之前講左幾多次 , 同事一日見我人係到 , 無幾多個係會上心聽 , 個個都一心諗住拖到最後先 . 其實我既工作應該係厭惡性 , 無人想接 .

平日大家覺得好簡單既野 , 當要佢地做時 , 個個都話原來好難好複雜 . 上頭應該都好頭痛 , 因為佢地無諗過平日我係真係做突左 , 依加其他同事接手 , 上頭好似唔太滿意同事表現 , 不過我自己都自先身難保, 我都係好好地專心養胎算 .

1 月 1 號返完工之後 , 我就病假 , 2017 既大假 ( 一日都未放過 , 因為太忙 ) , 2017 未清完既勞工假 ( 因為 2017 年時 , 被催放 2016 既大假 ... ) 以及 10 星期產假和 2018 年既大假 ( 我唔用左佢 , 相信要等到 2019 年先有得放 ) 一次過咁放到 5 月中先會再返工 .

公司的確唔會無左邊個同事就停止運作 , 我亦唔需要想太多 . 等再返工時 , 先再諗去向吧 ! 我依加只需要食同訓 , 最近檢查 , 醫生話 BB 已經有 7 磅多 , 所以應該 40 周前要催生出世 , 我係細碼媽媽 , BB 因為我控制住食量先由大碼去返中大碼 . 希望我可以自己生到佢出黎 , 唔洗食 " 全餐 " !



又係沖繩*2017*十一月*三日兩夜快閃 Shopping 團 ( 下 )

2017.11.04-06

沖繩既景點 , 小地勤都已經去過好多次 , 除非同家人去沖繩 , 否則多數只去三日便回香港. 如果大家係想睇景點介紹 , 可以去睇返我早期寫既沖繩行程 .

以前去三日 , 多數留係那霸市 , 租車錢都慳返 , 但依加大住個肚 , 老公唔想我行咁多路 , 所以依 2 次沖繩購物之旅都係自駕 . 比得租車錢 , 當然用盡佢 , 所以我放棄平日去開既小祿 AEON , 改到永旺夢樂城閒逛 .


我老公唔知點解好鐘意食菠蘿包 ... 每次黎 , 佢都一定要食的 . 今次期間限定夾住黑芝麻味雪糕 , 我一向都覺得依個菠蘿包又凍又熱怪怪地 , 不過老人家話食黑芝麻 , BB 會頭髮多同靚 , 為左個仔多頭髮 , 我都依左半個 .



之前覺得係 HANS 食牛扒包沙律 Buffet 同飲品 , 好抵食 . 但最近幾次都趕唔到 Lunch Time 抵食時段 , 晚餐時段閒閒地都要 8 千幾 Yen , 其實你沖繩好多 3 千幾 Yen 的任飲任食 , 所以今次我地就無再去 HANS .



改去美國村附近一間好出名既任食燒肉店 . 十月時我們結婚紀念 , 十一月是我們擺酒的日子 , 所以老公話今日要食豪一點 , 叫最貴果個任食燒肉套餐 , 印象中包海鮮 , 包豬一個價 , 包埋牛又另一個價 . 最貴既套餐 , 2 個人都只係一萬 Yen .

小地勤以前食好少野 , 亦唔鐘意食牛 , 但自從多左個 BB 仔之後 , 突然好大食 , 最鐘意食豬同牛 . 大肚婆口味的確會改變 . 燒牛肉 , 我地食左起碼 6 大塊 , 如果係 HANS 咁樣食法 , 應該幾萬 Yen .

唔似你和牛 , 不過就算係美國牛 , 食佢 6 大塊都已經回本 , 我地仲飲左起碼 8 杯飲品 , 甜品食左起碼 10 杯 , 包括新地 , 奶凍 , 杏仁凍 ... 仲有無數的蝦 , 帶子 , 栗米粒 , 牛舌 , 牛仔粒 . 由於我太肚餓 , 老公正係掛住燒比我地兩母子食先 , 結果中段要叫碗飯同湯頂住肚 , 我地依餐真係好抵食 .





生完 , 相信小地勤又會回復返以前咁細食 . 坦白講 , 我依段時間係我人生中食得最開胃 , 再多 , 我都食得落咁 ... 結果係 ... 下轉產檢時 , 我個仔生長得太快 , 比其他 BB 大左 3 星期 , 肚餓都要節食減肥 ... 原來減肥真係好辛苦 , 餐餐食唔飽咁 T^T

依餐食得好飽 , 但返到酒店 , 都係菬左樓下便利店買野食 , Godiva 個件野真係好好味 , 食完一件想再去買返 , 已經無曬 ... 唯有睇下下年再去日本時 , 有無緣份再遇上 .




去機場前 , 我地又去左小祲 AEON 個超市 , 佢開好早的 . 發現左一支好靚既酒 , 我老公話下年要黎買依支酒 , 前面刻我地結婚紀念日 , 後面刻仔仔出生日 , 都幾有意義 , 雖然會好貴 , 但我今次唔會反對 . 的確係一個好好既紀念品 .


~完~

2018年1月22日 星期一

又係沖繩*2017*十一月*三日兩夜快閃 Shopping 團 ( 上 )

2017.11.04-06

今年最後一飛 , 目的有三 : 買 BB 野 , 孕婦需要散心以及用埋兩套免費機票 .

如果唔係個肚籮咁大 , 我地會選擇去北海道走一轉 , 而非沖繩 . 沖繩已經比我地依班香港蝗虫佔領了 , 我地改變左沖繩人既生活 , 佢地以前未到晚上七點就會好似死城咁 , 依加為左迎合我地香港旅客 , 酒店加價 , 貨品加價 , 好多藥妝店 , 好多其他區域既拉麵店 , 閒閒地商店開到晚上九點 , 超市好多轉做廿四小時 , 亦多左好多大型商場 .

對一眾地勤媽媽黎講 , 沖繩係最近既日本地方 , 只要有兩日假期 , 就可以衝過黎買買買 ... ... 雖然沖繩既物價已經比以前貴左好多 , 但由香港到沖繩只需兩個小時多一點點 , 難怪仍是同事心目中既日本首選之地 !

今次再無撞正任何假期 , 早機出發 , 到達當地好快就攞到車 , 老公好喜歡係日本自駕遊 , 我地大大話話都租過廿幾次 OTS , 唔知係唔係因為有記錄 , 所以最近經常 Upgrade 我地 . 其實我地都試過好幾間日本租車既公司 , 不過一來我地日文不良 , 溝通唔到 , 二來我公司既航班時間有時都 " 不似預期 " , OTS 通常開廿四小時 , 對我地黎講 , 會比較方便 .

爭取時間 , 路過超市 , 先買一堆零食同飲料放係車內 , 小地勤依加係一個食極都仲可以繼續食既大肚婆 , 整個孕期 , 開頭最驚險 , 但就一直好好胃口 , 又食得又訓得仲好行得 . 算是很不錯了 .

我地好鐘意黎泊港漁市場 , 因為價錢便宜過牧志市場 , 而且依到仲有好多免費車位 , 方便自駕人士 . 國際通泊車好貴 , 而且又唔係泊得近 , 好唔方便 .


上個月黎泊港漁市場 , 已經鰥現多左好多熟食買 . 小地勤亦可以有得食 ! 不過我都有食少少貌似熟食既魚生 , 日本既魚生 , 我先敢試下 . 求左老公好奈 , 佢先准我買咖啡牛奶 , 好奈無飲過咖啡了 , 真係要一小啖一小啖咁慢慢品嚐 !



日本物價就算點加 , 都無香港物價升得咁快 . X 年前既日本 , 汽水機 100 Yen 選擇超多 , 依加都仲有 100 Yen 選擇 , 只係少左 . 我地買左一支 60 Yen 既產品試下 , 60 Yen 唔買好似對唔住自己咁 .





雖然黎過好多次沖繩 , 但我都無去過宜野灣個頭 , 所以今次就去行下 . 日本物價有幾抵 , 大家望下啦 , 所以點解小地勤好幾年無係香港買衫褲鞋襪 . Puma 一對唔洗 300 蚊 , 當然小地勤唔係追款既人 , 我平日係香港行商場 , 見運動鞋平極都要 450 以上 , 咪一樣係無款 .


日本洗頭水 , 萬寧起票賣 70 幾蚊 , 日本 20 蚊包都有 . 我無特別用開邊款 , 平 , 我就買 .


香港 AEON 一架最平既 Car Seat 起碼二千蚊 , 日本 10000 Yen 以下的 , 唔同款 , 有英國 , 歐洲 , 仲有 Made in Japan , 最後我地買左依個 , 六百幾蚊 , 由 0 歲用到 4 歲 , 抵玩吧 !


又到夾公仔既時間 , 老公唔夾返幾轉係唔會肯繼續開工 . 我就自己坐開一邊 , 閉目養神 .


傍晚時分 , 係附近食個早晚餐 . 食堂食飯真係好平 , 旁邊仲會有本地特產買 , 我地買左兩包綠茶 , 大大包 30 蚊 , 註明沖繩產 , 送人做手信都好好睇 .




兩個餐不用 2000 Yen . 味道當然唔會差 . 份量亦係正常的 , 沒有減少 . 不過內裡唔係靚個種 , 想打卡影相既遊客就唔好去啦 . 只為食飽個肚 , 就不防試下 .




以前去 Birthday , 都係幫妹妹買野 , 今次到我地自己買野啦 . 老公比我更瘋狂 , 依樣又話買 , 個樣又話買 . 果然做左人地老豆 , 係會唔同左 . 本來又話去打個圈 , 結果行左兩個幾鐘 !


日本既串燒其實又平又好味 , 每次見到都會買返 5 , 6 條食下 .


返到酒店 , 已經十一點幾 , 專登去試下幾他拉麵店 , 你紅燈區內 . 都唔錯 , 不過我都係覺得後街個幾間比較好味 .



2017年12月1日 星期五

又係沖繩*2017*十一月*仔仔大豐收

04-06.11.2017

航空公司要求懷疑 28 週的女士提供醫生證明才可以坐飛機 , 為免麻煩 , 小地勤於 26 週時 , 又再飛了一轉沖繩 . 2017 年的免費票也終於用完了 ! 沒浪費喔 !

10 月的沖繩 , 主要係去格下價 , 今轉的沖繩 , 就向住上次既目標進發 , 買呀買呀 ! 係宜野灣商場買左一大車物品 . 老公一直對日本既 Car Seat 念念不忘 , 每次係香港商場 , 佢都會有意無意帶我去睇 Car Seat , 下一句通常係 " 你睇 , 香港賣好貴 " . 應該係想洗我腦 , 再等我答應 " 買 " , 既然佢咁想買 , 今轉沖繩就由佢啦 ! 大特價 8 千幾 Yen , 用到 4 歲 , 的確抵玩 .

其他地勤媽媽推介的 , 佢地講話好平好抵 , 每次都一定要掃 , 所以小地勤都掃左好多返黎 , 相信夠用 3 個月 , 只要坐完月 , 我依位新手地勤媽媽就可以飛一次 2 日 1 夜 , 買完就返去 . 其實我都好想係水貨店或網購 , 不過又怕被人呃 , 又怕買到假野 . 既然我既機票根本唔值錢 , 咪用左佢囉 . 相信這是所有地勤媽媽既任性行為 , 搵個藉口去 Shopping .

BB 洗衣液及 BB 洗奶樽液 , 計返每包不用 25 蚊 . 香港賣幾錢 ? 其實我都唔太清楚 , 小地勤真係好少係香港買野 .

其實其他地勤媽媽已經送左 3 舊人奶皂比我仔仔沖涼用 , 但我都買左 2 包 BB 沖涼兼洗頭既泡泡 , 主要係比仔仔洗頭用 , 和光堂聽聞深受日本媽媽喜愛的 . 其他地勤媽媽一再勸小地勤唔好咁懶 , 為左仔仔好 , 應該用棉花同食水幫佢清潔用 , 但坐月期間 , 我都唔想因為自己同仔仔麻煩到奶奶 , 所以都買定 BB 專用濕紙巾 . 個盒連一包濕紙巾其實幾貴 , 要成廿幾蚊 , 反而補充裝 8 包先賣 50 蚊 . 我見萬寧 3 包都要賣成 60 蚊 , 所以唔買唔得 .

仲發現左一支 BB 專用除嗅同除菌既噴霧 , 約 25 蚊 , 所以買來試下 .

宜野灣有一間好大間既遊戲機店 , 老公手痕 , 夾返黎 . 基本上仔仔既衣服鞋物 , 都係用表姐 , 堂姐及一眾同事比我既環保物資 . 如果唔係我老公既堅持 , 相信仔仔唔會有全新既物品 . 其實小地勤係唔係太菇寒呢 !?

其實香港都有得買 , 不過既然去開就順便買埋 . 橙色個盒係日本媽媽十大喜愛產品 , 換完片片揸 Pat Pat 用 , 賣成 3 千 Yen 的 , 網上講到成份好天然 , 好過凡士林 , 所以我都買來試一下 . BB 仔初出世 , 用好少少既產品 , 大少少應該無咁敏感 , 就可以咩都亂試下 . 其實我依個呀媽都幾無常識同亂黎 , 所以大家唔好學我 .

其實我 Post 自己買既用品 , 反而係想睇下其他媽媽有無更好意見比我 . 小地勤的工作好忙碌 , 好困身 , 平日返工根本無咩時間上網搵資料 , 放假係屋企又要做家務同執返個位比仔仔 . 我無好緊張 , 但都知自己唔夠準備充足 , 我都預左自己有排學 . 或者等仔仔出世 , 佢自然會教識我點做 , 哈哈 ... ...

其他地勤媽媽送左一堆用剩既初生尿片比我 , 老公朋友又送左 6 箱細碼尿片比我 , 所以我地都只買中碼尿片 , 好多人話尿片唔可以咁早買 , 會潮左 . 但我又覺得依加都秋冬啦 , 咁乾燥 , 唔怕啦 . 就算平日係超市藥房買 , 你咪一樣唔知人地放左幾奈 . 我既思維 , 好似同大部份人唔太一致咁 . 今轉搵到平貨 , 每包一千零幾 Yen . 點解用依個品牌 , 因為表姐仔由細到大都係用依個牌子 , 我依位姨媽每次飛日本都會幫佢買 1 , 2 包 , 所以表弟都跟住用 , 實無錯 .




表姐仔既衫褲鞋物 , 玩具以及用品 8 成半來自日本 , 因為佢有個地勤姨媽 , 而佢媽媽亦經常用姨媽機票飛日本購物 . 表姐仔最愛係 Birthday 及 Aeon 買物資 , 所以表弟仔都會跟住 , 佢買過咩 , 我就買咩 , 唔洗煩 .

BB 枕頭係我地尋到既寶 , 1000 Yen , 仲要 made in Japan , 仲要有 2 個功能 , 一面係冬天用 , 一面係夏天用 , 超抵超實用 .

熊仔水溫器 , 係奶奶建議買的 , 話比仔仔沖涼時用 , 買定無壞 .


今轉都係無買野比自己 , 正係買野比仔仔同屋企人 . 我依加肥左咁多 , 都唔方可以扮得靚 , 所以都唔洗攪好自己 , 定仔仔出左世 , 我坐完月 , 先再執返自己個樣 , 哈哈 ...

我的確係懶到出汁既媽媽 !!


2017年10月20日 星期五

沖繩*2017*十月*棉婚快閃之旅 ( 下 )

7-9.10.2017

每次黎那霸市 , 早餐都會係泊港漁市場解決 . 感覺比牧志市場抵食 . 跟一個不吃生既人去旅行 , 我老公都只可以食少少過下隱而已 .

我地每次都會去中部個間激安店買野 , 比較大間又少旅客 , 貨品較多 . 沿路總會係二手店停留一兩個小時 , 依個時間就係我午睡既時候 . 其實我屋企有好多 Display 櫃 , 就好似咁樣 . 仲有一間房係放曬全部未開箱既產品 ...




 行酒舖亦係我老公另一嗜好 , 所以我屋企一樣係有好多珍藏 ...

國際通間比卡超專門店唔見左 , 第 2 次見到依個商場執粒 ... 依個位似乎唔太 ok .



又肚餓 , 又慶祝 , 依間牛店越來越貴 . 好彩我今次好大食 , 應該回到本 ! 其實食 2 個餐既價錢夠我地兩個去美國村食任食放題了 .

同事比左好多 BB 二手衫我 , 都好新 , 應該都夠著 , 所以我本身唔打算買 . 但老公又帶左我去玩具反斗城 , 又不停係到睇衫仔 , 見佢咁想買 , 就由佢啦 . 剛好做折 , 買 10 件起有 7 折 , 7 算再 7 折 , 又的確好抵買 .

我老公話我太慳 , 點都應該買幾件衫仔比個仔 , 最後佢買左 10 件 , 全部都係佢係一堆衫裡面搵到既寶 , 咁的確又幾得意 . 其實折完 , 每件唔洗 50 蚊 . 但我就覺得買太多了 , 著人地二手咪得囉 , 大得咁快 . 隨住我個肚越黎越大 , 一個經常話唔鐘意小朋友既大男孩突然覺得自己的確係一個老豆 , 咁我又的確唔好掃佢興 , 由佢買 ...

今轉本身無諗住要過去個間永旺夢樂城個邊行 , 結果為左幫人買比卡超 , 都係去左一轉 .

今次冬甩店都轉左 HALO 喂版本 , 一個 SET 加大毛巾 . 不停咁食 , 我真係會超標 ...

我都已經唔記得今次係第幾次既沖繩之旅了 . 景點都應該唔會再去 , 行下買下野就可能會 . 假如有一日 , 我唔再做地勤 , 無機票 , 沖繩跟北海道 , 我一定唔會再去 .

沖繩*2017*十月*棉婚快閃之旅 ( 上 )

7-9.10.2017

今年仲有三套 FOC 未用完 , 見自己身手突然敏捷返 , 就決定黎個快閃之旅 . 平日如果去得 3 日 2 夜既沖繩 , 我地都好少會揸車 , 老公覺得我粗身大細 , 車出車入會輕鬆點 , 其實依位大男孩好似最近有點唔同左 , 腳踏實地左同細心左 , 個心亦無咁野 , 起碼今次行程佢乖乖留係酒店陪我 , 而無半夜出左去玩 .


40 日前可以享受早烏價訂 OTS 既車 , 選擇亦會很多 . 無奈行程一改再改 , 香港人會唔會太多假期同有錢 , 淡季都 Overbook , 仲話經濟唔好 ! 因為遇上 Overbook , 所以係機場白等左一日 , 回家就再決定改遲一星期出發 , 所有事前準備都要取消 , 重新再訂過酒店及車 .

雖然享受唔到早鳥訂車 , 但 OTS 卻 Upgrade 我們用大車 , 超級開心 .

差唔多一年無黎過沖繩了 . 南國既天氣還是很好 , 十月仍然是大太陽 , 如果北海道應該要穿大褸了 .


每次去沖繩都係幫家人掃貨多 , 嬲生女咸住咁 whatsapps 我 " 姨媽 , 我 d 包包超人麵無曬啦 , 無得食啦 ... " 聽到姨媽不知幾心痛 ! 小朋友真係好可愛同單純 , 為左一包麵可以咸到豬頭咁 .
既然小公主落左 Order , 我依個姨媽就當然買啦 , 麵包超人雜誌 , 麵包超人烏冬及拉麵 , 濕疹膏 , BB 專用潤唇膏 ... 買呀買呀 , 就已經一大堆 .

今次因為撞正沖繩有際典 , 所以只 Book 到 Apartment , 就係小錄附近 , 很好住 , 不過價錢就比平日貴左 3 分 1 .

今次的確純粹黎買野 , 所以都無去景點或遊客區 . 大肚婆成日都會肚餓 , 所以係小錄 AEON 頂層先食午餐 , 再行過 . 無黎一年 , 裝修過 ? 店都改變了 . 以前這間店食日式西餐的 , 現在就改為食日或餐 . 仲要貴左 , 不過點都係平過係香港食 .

好多人係 Facebook 提過既透明奶茶 , 我就覺得好奇怪 , 成支水咁 , 但又奶茶味 . 我都係鐘意奶茶色巴奶茶多一點 .

食完飯之後 , 我就放生我老公出去 , 我就留係 AEON 行超市 , 睇 BB 仔野 . 我係一個唔浪費又環保巴媽媽 , 即姑寒加現實型既媽媽 , 我絕對唔會係迫仔女讀書既怪獸家長 , 因為今時今日既香港已經唔再係可以知識改變命運了 . 就算讀書再叻 , 唔係讀專科 , 出到黎都係一萬頭人工 , 不如教下佢無野係可以不勞而獲 , 要學慬珍惜及唔浪費 .

行左好奈 , 我睇中左依 2 樣產品 , 今個月 AEON 有額外 95 折 , 仲有得退稅 , 不過其實我真係諗到最後個日先衝返去 AEON 一次過買 . 識人的確好過識字 , 老公既朋友有份攪 BB 展 , 所以送左 6 箱 S 碼尿片比我 , 同事個仔亦用剩 2 大包初生尿片 , 所以我今次去沖繩係掃 Merries 既中碼 , 可惜我依個呀媽的確咩都唔識 , 買錯左學習褲 , 其實都係一樣姐 , 唔理 , 會照用 , 哈哈 ...






遇見我好喜歡既日本品牌 , 可惜無買到野 ... 因為無一件衫適合依加既我 .






可能我太瘦 , 所以得 5 個幾月都令人覺得我個肚好大個 . 不過我都相信有其父必有其子 . 我個仔應該會係一個肥仔 .



轉眼間 ... 又肚餓了 , 所以去左新都心個邊食飯兼行下 . 行程的確好輕鬆 , 我只可以留係有冷氣既商場 , 太熱 , 我會好辛苦 , 而且我仲要不停上洗手間 ... 大肚婆唔易做 ! 我老公都話我依加大食左好多 . 我比以前更鐘意吃飯同肉 , 反而菜就麻麻 ...



每晚我的宵夜都是這個拉麵 , 真係拍得住街外既拉麵 , 但只需要 300 Yen , 我仲買左和牛同桃 , 真係好奈無食得咁開心 . 不過 , 其實醫生話我超重 , 要節食的 , 但我依加係超級忍唔到口既大肚婆 . 我已經由 100 磅去到 116 磅了 ...


這是我新買的 Mini Cooker , 朋友幫我從大阪帶回來的 , Size 比我以前那個更細 , 而且可以日本同外國通用 , 價錢約 HKD 250 , 抵過個摺疊式水煲 .