29.10.2015
第一日到札幌已經係晚上八點幾 , 即時飛車落函館 . 到達當晚 , 得返幾間居酒屋仲未關門 . 無選擇下的晚餐. 其實間居酒屋都已經準備打烊 , 人影都無個 .
食魚好似沖繩比較便宜同新鮮 . 北海道就食蟹同貝殼類 , 抵食兼大件 .
我老公真係好鍚我 , 明明好想食生野 , 都叫咁多熟食比我食 . 雖然佢唔算一個靚仔 , 亦唔太識計數 , 但佢的確對我好好 . 人地講得好 , 搵老公搵肥仔最好 , 又識食又識煮 , 一定唔會餓死個老婆先 .
雞肉鍋 , 用水煮 , 煲出黎既湯好清甜 !
擺得好靚既一字排開章魚丸 .
依件係燒飯團 , 對一個唔食生既人黎講 , 係北海道真係好難搵食 .
食飽都已經差唔多一點 , 函館好鄉下 , 成條街都無開 , 連搵間 24 小時既超市行下都無 . 好彩酒店個溫泉開到零晨兩點 , 算有少少野做下 . 浸完溫泉 , 的確好訓 .
第二日早上去朝市搵食 , 唔佔發生咩事 , 今日咩都無咁 . 係唔係因為打風 , 所以無海鮮呢 ?
世界第一 ? 的確係我見過最大既蘋果 . 係到買左一箱 4 個哈密瓜以及 3 條白玉玉米 , 但都沒有之前買的好食 , 可能唔係當造 .
海鮮係朝市少左好多 , 之前都放實物以及唔磅 , 成隻開個價賣比你 . 今次得餐廳先見到活生生 , 而朝市擺出黎都係冰鮮的或只有圖片. 十月既北海道已經無咩海鮮食 ?
係附近見到好多人排隊 , 其實我老公好想排埋一份 , 食生的 .
但佢行完一轉返黎 , 就帶左我去另一間無人排隊既店 . 因為得依間既熟食唔係燒魚 , 小地勤唔鐘意食魚 , 亦唔好生 . 事實證明 , 無人排隊 , 原因係難食 ...
中午一直落大雨到傍晚 , 我地唯有去行商場 , 係無印 , 我買左個垃圾桶返屋企裝遮用 . 又係藥店幫朋友搵尿片 . 原來澳門都無尿片買 , 仲慘過香港 .
之後又去夾公仔 , 但搵唔到我姪女指名要既細菌小子 , 唯有買本 " 包包 " 書比佢地 . 正係識講單字 , 但又識叫你買野比佢 , 依加既 BB 仔真係好聰明 .
搵唔到公仔夾 , 就夾左小小零食 , 正係比左 100 Yen 就推到落黎 .
又係為朋友 , 所以食左兩個開心樂園餐 , 為的是 Melody 公仔 ... 第一次係日本食 M 記 , 不過個薯條真係好好食 , 比香港既好食 , 起碼唔係又硬又濃 .
之後去左間激安到行 , 好多層 . 但我卻用左 3 個鐘行第一層 , 結果樓上都關門了 ... 我買左部碎冰機夏天用 , 明天無咩用 , 但見到 30 蚊盲買左 ... 又買左一大盒層架 , 日用品 , 拉麵等等返屋企 . 其實日本都真係好多野買 .
一直想試食依間店既蛋包飯 , 終於可以試到 . 的確抵食 , 好味又大件 , 我食左一半已經食唔落 .
仲有佢杯雪糕 , 真係超好味 ! 函館必食 .
函館有間蔦屋書店 , 又係好多野買 , 好大間 , 係到我買左好多貼紙整相簿 !
我本相簿 .
我仲買左個同款的相架 .
27.10.2015
網上既小地勤唔知會唔會令大家覺得我好似好 " 完美 " 咁呢 ? 因為有朋友睇完我個日記板後 , 有咁既感覺 .
而真實既小地勤其實係朋友眼中係一個對 " 錢 " 極度敏感既人 , 精打細算 , 格價高手 , 理財有道 , 係佢地成日用黎形容我既詞語 . 我既口頭蟬係 " 我唔做蝕本生意 " " 我好鐘意錢 " " 唔好問我借錢 , 講錢失感情 " . 我拒絕人 , 拒絕得好狠 , 所以從沒有人夠膽問我借錢 , 我亦免卻好多麻煩 .
轉眼間 , 我已經結左婚半個月 . 我結婚好低調 , 一來我無諗住炸人 , 二來我亦無諗住亂派餅 . 食得我打餅既人 , 係我心目中係佔有重要地位的 . 長輩問我 , 唔請人飲又唔派餅 , 唔怕比人背後講嗎 ?
坦白講 , 我唔怕 , 更一向唔理其他人點去諗我 . 我知道實有人會因為我 " 旅行結婚 " 而睇低我 . 由佢吧 ! 我有幾多錢 , 或我有幾窮 , 唔會因為別人一句說話而改變 , 所以我從不理會 . 再者 , 我其實係有擺酒 , 只係唔想請人而已 . 今時今日 , 炸人地 , 人地又會話你好炸佢 . 雖然擺酒唔係為賺錢 , 但我都唔會想蝕到入肉 .
我要請都只請那些真心朋友 , 因為我與佢地既交情 , 我可以為佢地蝕 ! 正如 , 食得我打餅既人 , 亦係我真心想請食餅 , 而唔會要佢地比利是或禮物我 . 而無咩交情既 , 我點解要請佢食野先 . 佢地要背後講 , 咪由佢囉 ! 結婚係我地兩家人既事 , 根本唔洗理其他人點講 . 我都幾自負 !
因為我無同人講我結婚 , 所以好多人都唔知道我嫁左人 . 直到我屋企人 Post 左相上 Facebook , 我得到的是幾百個 Like , 哈哈 ... 我連餅都無點派都有 Like , 賺左 !
送賀禮比我的 , 都係我貴賓室既同事 . 有些係我結婚前就送左比我 , 有些係我放完婚假返黎先比驚喜我 . 我唔想人地為我破費 , 所以我一直低調 . 依位朋友好強調話自己無錢架 , 結果又係買野送比我 . 禮物係講心意 , 仲要我只係請人食打餅 , 都仲有野得到 , 對我黎講已經係 Over 曬 . 貴賓室既一班舊同事就好似我屋企人咁 , 朝見口晚見面 , 工作開心 , 都係因為佢地帶比我一個家的感覺 . 我可以捱到今時今日 , 都只因佢地未走曬 .
依份禮物係唔係好靚呢 ? 係一位飛行常客送我的 . 她跟貴賓室的同事都很熟 , 但就跟我比較投緣吧 ! 起初佢係其他同事既熟客 , 後來跟我變成最熟 . 佢就係見到我 Facebook 既相後 , 先知道我結婚了 . 之後 , 專登買份賀禮 , 叫我同事轉交比我 . 當我知道依個消息時 , 真係感動到咸左出黎 . 同為地勤 , 但我得到的比別人多 . 雖然我成日都鬧公司 , 但無佢就的確唔會有我 .
23.10.2015
今日既小地勤當年也是薯仔一名 , 英文水皮 , 國語更加係無人聽得明 . Senior 見到我就嫌棄 , 掃把見到我就驚 . 但再新既人 , 經歷左無數件大小事情後 , 也會成長的 . 今日我就以過來人身份分享小小心得 . 如果有錯 , 可以更正我 , 因為我太奈無 " 做機 " 同 Check-in 過 .
1. 落更前 , 公司已經會比張 "電話卡" 你 . 你地應該明我講邊張超有用既電話卡 . 得閒就望下上面有咩電話 , IC 電話 , FIDS 電話 ... 要認一認個位置 , 有起事要 Check 野時 , 電話卡幫到你 . 最好叫你位師傅仔講一下張卡上既號碼幾時需要用 . 如客人要改機票時 , 一般都會 Call IC check 下條飛 , 再睇下條飛洗唔洗補錢 , 當然掃把睇機都識睇飛 , 但改 Booking , 佢地就唔一定識 .
2. 唔好用墨水筆 . 知唔知咩叫莫須有? 墨水筆寫係 Boarding Pass 上係會甩色的 , 客人最鐘意將 Boarding Pass 夾係 Passport 到 . Passport 花左就賴你架啦 ! 請緊記用最平既 "原子筆" , 我仲專登用紅色 ! 紅色夠搶眼 , 圈住佢個登機時間 , 佢就無得賴我無提過佢 . 紅筆仲唔會有客問你借 , 減低損失 . N 年前我亦因為用紅色係客張 Boarding Pass 上簽名而被客好大反應咁話你做咩係我張登機證上面畫符 . 小地勤當時笑笑口答 " 這是幸運符 , 保你一路順風 , 返到去記住買彩票 , 中左要請我飲茶 " 個客開心到叫曬成班朋友問我攞簽名 .
3. 每次做機 , 都要洗自己腦 . 記住航班編號 , 諗下有咩雖要留意 . 如去上海 , 記住外國人要 Check Visa . 香港人要對名 , 對 expiry date 等等 . 記住今日幾號 , 有些地方護照要半年以上先可以入境 , 唔記得 , 就 check TIM . 最好跟師時 , 叫師傅教你睇 TIM . 初初有好多野要記 , 買本簿仔記低佢 . 當年小地勤要學好多唔同既 System , 我做左咁多年 , 都一樣要用簿仔 .
4. 遇到問題 , 唔好估估下 , 問掃把或睇機 , 雖然佢地語氣唔一定好 , 但佢地係最唔想班航爆鑊既人 , 一定會話你知點做 , 你爆鑊 , 佢就大把手尾同 Report 要跟 , 所以佢地最可信 .唔好問同事仔啦 ! 人地可能都只係做你幾期 , 咩都唔識 , 點錯你 , 你怪佢咩 ? 遇到好人時 , 就聽下人地點教你 , 唔係個個肯教人的 , 要珍惜 .
5. 唔做的確唔會錯 , 但同一時間 " 永遠也學唔識 " . 主動去做 , 主動去問 , 先會成長得快 . 每次離開電腦時 , 叫住 Sign Out . 個 code 比人用錯 , 做錯事就會搵你 .
6. 地勤最常見既事有 A. 客人 CANX FLT , 要點做 ? B. 客人改 BOOKING , 要點做 ? C. 登機閘口轉左 , 要點做 ? D. 背熟你個登機廣播 , 得閒就係屋企讀下 . E. 去到閘口有咩文件要 PRINT. F. 係 CHECK-IN 櫃位時 , 要習慣用同一手勢 , 唔好今日 CHECK 左證件先 , 聽日又睇左機票先 . G. 客人唔見登機證 , 行李牌又要點做 ? H. 點樣入里程等等 ... 跟師時 , 記住問清楚師傅仔 .
7. 做野唔好急 , 急就會亂 , 但最緊要快 ! 係機口 , 記住要對名 , 真係要對清楚 , 好多人既名好相似 , 望航班編號同日期 , 真係會有第日機既客一早入左黎以及排左係條 Q 到 . 叫住睇過期日呀 !! 小地勤做咁多年 , 都衰左一次 ... 仲要係勁白痴 , 連特區護照都睇錯左 . 好彩係當地 IMM 都同我一樣睇錯 , 不過回程時個客就被嚇親 , 因為回程先發現過左期 ...
我暫時正係諗到咁多 ... 下次再諗到先再分享 !
22.10.2015
日期 : 09-13.10.2015
地點 : 千歲。北海道
黎過咁多次新千歲機場都仍然無咩機會認認真真咁行一轉 . 每次到步就趕住去攞車 , 每次離開又買到趕頭趕命 . 今次都一樣係趕住走 , 唯一唔同既係 , 今次我有個半鐘頭時間行下兼食飯 .
一直好想試叮噹餐廳 , 我仲好豪氣咁同老公講 , 唔理幾貴我都要食 .
結果係兩個餐 , 連飲品都唔洗 140 蚊 ! 叮噹個杯係凍飲 , 大雄個杯係熱飲 . 兩杯都係藍梅奶昔 , 堅好飲 !
我坐左唯一一張叮噹藍既圓枱 , 其實我地兩個都唔係叮噹 FANS , 但黎到依到 , 我好似回到小時候 , 腦裡想起的 , 是小學時暑假既畫面 . 以前讀書都幾無憂無慮 .
依間餐廳 , 無咩人 , 可能大家都好趕時間 .
我老公指名要食依個餐 , 大家知唔知依件係叮噹既咩法寶呢 !?
唔好睇佢好似好 Dry 咁 , 超好食 ! 個包好有奶味 !
雖然我唔係 Fans , 但都好有衝動帶走依張紙 .
我就記左個甜品 , 都係超好味 ! 不過食既時候 , 覺得自己好殘忍 , 我界爛左 Doraemon 塊瞼 .
張紙巾都好靚 ! 隻匙都係叮噹 !
對面係小朋友天地 , 好多小朋友係到玩緊 . Doraemon 應該係日本小朋友心中同麵包超人一樣咁受歡迎 !
旁邊有間 Work Shop. 不過我都無咩時間睇下人地做緊咩野 .
另一邊就見到小朋友係到填色 . 仲有大人就係到睇漫畫 .
之後我地行左去精品店 .
叮噹食品 .
叮噹+Hello Kitty , 原來佢地係朋友 ! 我最鐘意係叮噹同 Kitty 係隨意門到伸左個頭出黎既野 .
依堆明信片 , 我下次就會寄比自己 !
成個機場都好似被叮噹入侵咁 ! 好開心 ! 但強調 , 我唔係 Fans , 所以更突顯叮噹既威力真大 .
依邊要收錢入去 , 好想去睇下 , 但我仲要趕飛機 . 唯有留到下次先再黎 .
22.10.2015
今日走了一個同事 . 不捨 !
回想當日個個 In-charge 都話佢唔 OK , 做得唔夠好 , 但又無人會諗下去教好佢 . 當開會時 , 個個講佢做得有幾差 , 而我卻奇怪地只覺得佢係新 , 而唔係差 .
有時 , 我成日覺得 , 既然個新人有問題 , 點解 In-charge 見到都唔開口教佢 , 正係識得背後講或去忍 ? 由幾時開始 , 好似得返我一個去教同事呢 ? 當原有的三個 Leader , 一個升職 , 一個放產假 , 依到就斷層了 .
今日同事離開了 , Last Day 拍我 , 我同佢分析利害 , 結果佢同我講 , 覺得自己太衝動 , 沒想清楚就話唔做 , 可惜已經 Last Day , 沒法再改變 . 假如我不是剛好放婚假 , 可能我可以留到依位好同事 .
係某些人眼中 , 可能佢都仲係唔夠好 , 但係我眼中 , 佢好勤力 , 亦真心唔想我辛苦 , 好肯幫我 . 佢走既時候同我講 , 好鐘意拍我 , 因為我真心為同事好 , 會比同事休息 , 亦好肯教同事 , 係佢心中 , 我先係佢個師傅 . 聽到 , 好感動 .
佢唔會因為我好心提佢 , 而話我針對佢 . 有時 , 好人係好難做 . 亦唔係個個接受我既好意 . 好多人背後一面話羨慕某同事既師傅係我 , 又話好想跟我學野 , 但每當我好言提點時 , 卻不是佢地口中所講咁想跟我學野 .
其實我真係好肯教人 , 因為人地學識左 , 我就可以無咁辛苦 . 但得我一個 , 邊教到咁多新人呢 ? 我好唔明白點解比較 Senior 既同事 , 膽量咁細 , 連比新同事去做下 , 都怕會出事 . 新人唔做 , 永遠唔識 , 做得睇場就要有擔大 , 係對自己無信心 , 定唔識教同事 , 定根本怕事 ?
永遠有問題既同事就要跟住我 , 直到被我教好了 , 成果卻與別人分享 , 其實我都幾慘 . 雖然矛盾地教好一個人 , 我自己都會好開心 , 但眼間其他同事唔幫忙 , 我心裡面都好難過 . 個個都叫我升職 , 好似升左職就可以避開班有問題既同事咁 ... 不過 , 我就自私地覺得 , 升左職 , 我只會更多野做 . 我堅唔想 .
世界好似好唔公平咁 , 實幹型既只會越黎越多野做 , 相反 , 就繼續無所事事 . 現實果然不如人意 .
21.10.2015
日期 : 09-13.10.2015
地點 : 函館。北海道
師奶地勤第一次浸溫泉 . 上次黎函館 , 我都有住溫泉酒店 , 但就無勇氣咁坦蕩蕩去浸溫泉 . 今次比左咁貴既酒店錢 , 唔浸真係好蝕底 , 所以當晚我就同自己講 , 你唔望人 , 人唔望你 . 當咩都睇唔到 , 原來沒我想像中尷尬 , 仲大開眼界 .
今次依間酒店房好大間 .
洗手間同浴室係分開的 , 不過每日都浸溫泉 , 所以都無用過間浴室 .
師奶地勤第一次住咁好 , 不但有客廳同廚房 , 仲有個衣帽間 .
露台都有呀 ! 風景都唔錯 , 起碼唔係對住另一大樓既洗手間 . 我以前係沖繩的確間房對正對面公司個厠所 .
每朝早既早餐都好豐富 , 有刺身同魚子飯 , 當然亦好多熟食及沙律 .
係函館大部份既時間落大雨 , 我終於有機會正 Shopping . 係 JR 站行下 , 不過原來 JR 站係無野睇架 .
本來一心諗住唔落雨就去多次五稜角公園 , 睇下搵唔搵到紅葉 . 去唔成唯有買張明信片 .
每次開車經過都好想落車影張相 .
臨走前 , 終於遇上好天氣 , 可以慢慢影 . 對面就係函館山 .
北海道 :
函館 :
好大風大浪 , 大海真係好靚 .
依條步行徑既風景真係好靚 . 海風令人好舒服 , 聽下海浪聲的確好 Relax !
見依個地方要收錢參觀 , 但人影都唔多個 , 仲要好細間咁 , 所以影張相就算 .
